
Li Dirbêsiyê daxwaza perwerdeya bi kurdî

2026-09-05 15:16:26


	&nbsp;

	NAVENDA NÛÇEYAN - Şêniyên bajarê Dirbêsiyê li dijî biryara Wezareta Perwerdeyê ya hikûmeta veguhêz a Sûriyeyê ya têkildarê zimanê kurdî de daketin qadan û bertekên xwe anîn ziman.

	&nbsp;

	Şêniyên bajarê Dirbêsiyê ji bo şermezarkirina biryara Wezareta Perwerdeyê ya hikumeta veguhêz a Sûriyeyê ya girêdayî dayîna tenê 3 dersên zimanê kurdî di hefteyekê de, xwepêşandanek li dar xist.

	&nbsp;

	Mamoste, endamên saziyên sivîl û meclisan, Hêzên Ewlekariya Hundirîn, nûnerên tevgerên ciwan û jinan li bajêr tev li xwepêşandanê bûn.

	&nbsp;

	Xwepêşandanê ji Qada Jinan bi sloganên “Bê ziman jiyan nabe” dest pê kir û li pêşiya Rêveberiya Dibistanan a li bajêr rawestiya. Piştî deqeya rêzgirtinê bi navê şêniyên bajarê Dirbêsiyê ji hêla mamoste Hojîn Hêrz ve daxuyaniyek hat xwendin.

	&nbsp;

	Di daxuyaniyê de hat diyarkirin ku biryara wezaretê kêmkirina mafê esasî ya gelê Kurd e, zimanê kurdî nikare bi biryarên siyasî were sînordarkirin, mafê perwerdeya bi zimanê dayikê nabe ku bi 3 saetan tenê were dayîn.

	&nbsp;

	Di daxuyaniyê de hat destnîşankirin divê Sûriyeya nû li gorî naskirina pirrengiya neteweyî, zimanî û çandî were avakirin, divê zimanê kurdî bê naskirin, biryar li ber çavan bê girtin û bê guhertin.

	&nbsp;

	Her wiha di daxuyaniyê de hat diyarkirin ku ji bo parastina zimanê kurdî, misogerkirina mafê nifşên bê yê perwerdeya bi zimanê dayikê dê têkoşîna wan bê berdewamkirin.

	&nbsp;