Hemverê hêrişê Rojawanî ser o reaksîyon: Ma yew parçe yê 

2026-02-04 11:39:15


	 

	Melîke Aydin

	 

	STENBOL - Cinîyan hêrişê Rojawanî ser o protesto kerdî û hemverê HTŞ û çeteyê cîhadîstî venga pîlkerdişê têkoşîn û xoverdayîşî kerdî.

	 

	Kadikoyê Stenbolî de 1ê Sibate Roja Piştîdayîşê Bi Rojawanî yê Dinya de, bi hezaran kesî ameyî têhet û hêriş şermezar kerdî. Cinîyê ke tewrê çalakîye bîyî hemverê HTŞ û çeteyê cîhadîstî venga yewîye kerdî û mesajê nê xoverdayîşê bidominê dayî.

	 

	‘Ganî heme cinî bibê yew’

	 

	Cinîya bi nameyê Gurbet Alkan dîyar kerd ke adirbestê 30ê Çeleyî de HTŞ’yî dir ame kerdiş muhîm o labelê qîm nêkeno û wina va: “Na nuqta de ganî şarê kurdî her tim bi xo bawer bibo. Ganî heme cinî bibê yew. Kam ci nîjadî ra bebo wa bibo ganî her kes bêro têhet û wurzê lingan ser. Qîm nêkerdêne zî her cayî de serewedaritiş estbî.  Ma cinîyan her tim piştîdayîş da. Semedo ke ma kurdî bî piştîdayîşêk baş nêame dayîş. Ganî cinîyê kurd, tirk, elewî û çerkez bibê yew. Semedo ke ê cinîyan tehluke vînenê. Ganî heme cinîyê Tirkîya hemverê nê hêrişan de bibê yew.”

	 

	‘Ganî Tirkîya fek piştîdayîşê çeteyan ra vera bido’

	 

	Dayîka Aştîyê Sabîha Bozan zî dîyar kerd ke binê nameyê dînî de qirkerdiş yeno kerdiş û destûr nêdanê cenazeyê kurdan goreyê îslamî bêrê şutiş û wina ard ziwan: “Silawatan anê û tut, sivîlan qetil kenê. No dînê tu kesî nîyo. DAIŞî name vurnayo, kurdan, elewîyan, durzîyan qetil keno. Labelê Rojawan de heme şar mîyanê aramîyê de pîya ciwîyenê. Ez venga heme kurdan kena. Wa nê zilmî qebûl nêkerê. Ma hêrişan şermezar kenê. Wa Tirkîya dest piştîdayîşê semedê HTŞ û DAIŞî verabido.”

	 

	‘Kurdî azadîye wazenê’

	 

	Hulya Bakir dîyar kerd ke şarî wareyê xo ra ame vetiş û wina dîyar kerd: “Demo ke mi dîmenê şîdetî dî, ez cayê xo de nêvinderta. Kam bîyîne do venga xo berz bikerdêne. No normal nîyo. Çira her tim zilm kurdan rê yeno kerdiş. Ma ameyî tîya, polîsan ma cigêrayîş kerdî, tehemulê ma nêkerdî. Ma wazenê deyîrê ma bêrê vatene, dibistanan de tutê ma bi ziwanê xo perwerde vînenê. Ma azadîye wazenê. Êdî bes o. Ma şer nêwazenê, ma aştîye wazenê.”

	 

	‘Ma herra xo wazenê’

	 

	Saîme Tunç zî wina va: “Wazenê şarê Kobanê bikişê. Kurdî bi hawayêko azad ziwanê xo qisey nêkenê. Ma semedê şarê kurdî azadî û têduştîye wazenê. Wa cinî nêrê qetilkerdiş. Wa tutî nêrê qetilkerdiş. Ma herra xo wazenê. Ê wazenê kurdî bibê kole. Ma koleyê tu kesî nîyê. Ma serberz ê.”

	 

	‘Ma do bi ser kewê’

	 

	Çîçek Çakar zî nê çî va: “Ma wazenê kurdî bibê yew. Ma do bi ser kewê. Ma şervanan silam kenê. Ma çar parçe nîyê, yew parçe yê. Biciwîyo Rojawan, biciwîyo Kobanê, ma do qetî bi ser kewê.”