‘Ablûqakerdişê Kobanê giran beno, şorişê cinîyan hedef yeno girewtiş’ 2026-02-07 11:37:33   Rabîa Onver   MÊRDÎN - Endama TJA’yî Perîhan Agaoglu dîyar kerd ke ablûqayê Kobanê dir înîsiyatîfê şarî yê demokratîk ê bi serkêşîya cinîyan pê ameyê, hedef yenê girewtiş û va: “Tu hetê wijdanî û merdimîyeyê nê hêrişan çin o.”   HTŞ, DAIŞ û çeteyê girêdayeyê Tirkîya 19 rojî yo Kobanê ablûqa kerdî û no cuyayîşê bi hezaran kesî tehdîd keno. Bajarê ke 600 hezar kesî ci de ciwîyenê derman çin o, şitê tutan û xidayê esasî resayî sewîyeya qedênayîşî. Semedê birnayîşê ceyranî, hîn beşê nêweşxaneyan de xizmet nîno dayîş û lazimîyê esasî yê şarî yenê astengkerdiş. Mîyanê HSD û HTŞ’yî de 30ê çeleyî de peyman ame îmzakerdiş û peymane 2yê sibate ra ameye bicaardiş. Labelê ablûqa hema dewam kena.   Aktîvîsta Têgêrayîşê Cinîyanê Azadan (TJA) ya Mêrdînî Perîhan Agaoglu derheqê hêrişê Rojawanî û Kobanê ser de qisey kerd.   ‘Înîsiyatîfê şarî yê demokratîkî aver kewt’   Perîhan Agaoglu da zanayîş ke no dewamê prosesê komployî yo û wina va: “Nê prosesî dir şarî her çar parçeyê Kurdistanî de tewrê nê têkoşînî domnayî. Her kes zaneno ke Rojawan de destkewtişêk dinya ame bidestkerdiş. Bi şorişê cinîyan ê Rojawanî yê hemverê zihniyetê DAIŞî, heme dinya xo asayîş de hîs kerd. Ma vînenê ke fehmê dewletan de tu wext demokrasî çin o. Yanî welatê ke vanê ma demokratîk î zî esasî de dinya de heqê merdiman binpay kerdê. Semedê nê zî gamê şorişî yê Rojawanî gamê giranbuha bîyî. Uca înîsiyatîfê şarî yê demokratîkî aver kewt. Semedê nê zî nê şorişî bi serkêşîya cinîyan pê ame, hedef ame girewtiş.”   ‘Proses de samîmîyet çin o’   Perîhan Agaoglu dewam de dîyar kerd ke Tirkîya de prosesêk aştîye yenê domnayene û heto bîn zî hemverê Kobanê û Rojawanî de hêrişî dewam kenê û wina va: “Tîya de yeno dîyayene ke prosesê aştîyê de samîmîyet çin o. Rewşa Kobanê ya tîya ra xoser nîya. Kurdan sey astengîya girdî vînenê. Nêwazenê kurdî bibê wayîrê vatişî. Kobanê semedê têkoşîn, hişmendî û bîyayîşê cinîyan bîyo nimûne. Têkoşînê hemverê DAIŞî yeno zanayene. Labelê zihniyetê DAIŞî ewro zî Kobanê ablûqa kerdo. Tu hetê nê hêrişan yê wijdanî û exlaqî çin o.”   ‘Wazenê Kobanê îşxal bikerê’   Perîhan Agaoglu dewam de dîyar kerd ke têkoşînê Kobanê ameyo domnayene dir rûmetê merdimîye newe ra agêrayo cuye û va: “Tirkîya û Ewropa hemverê heme hêrişan de bêveng mendî. Verê çimanê dinya de wazenê Kobanê zî sey Xezeyî îşxal bikerê. No îşxalkerdişê herrêka normal nîyo. No mudaxaleyê cuyayîşî yo. Mudaxaleyê sazbîyayîşê demografîkî yo. Semedê nê wazenê Kobanê îşxal bikerê. Têkoşîno ke kurdan her çar parçeyê Kurdistanî de domnayî her cayî de veng dayî. Nê têkoşînî dir cesaret û yewîya şarê kurdî vejîya vernîya. Rojawan destkewtiş o. Destkewtişêk dinya yo.”