Kobanê de semedê serbestveradayîşê tepişteyan rayîrşîyayîş

2026-04-11 14:37:34


	 

	MERKEZÊ XEBERAN - Kobanê de, bi hezaran welatijî bi serkêşîya keyeyê tepişteyan kewtî meydanan û semedê serbestveradayîşê tutanê xo yê ke destê Hukmatê Demkî yê Sûrîye de yê, rayîrşîyayîşêk girseyî organîze kerdî.

	 

	Kobanê de bi serkêşîya keyeyê tepişteyan û sazîyanê komelî yê bajarî semedê waştişê serbestveradayîşê tepişteyanê ke destê Hukmatê Demkî yê Sûrîye de yê, rayîrşîyayîşêk girseyî ame organîzekerdiş. Girseyo ke Meydanê Jina Azadî de dest pêkerd, heta Meydanê Aştîye dewam kerd. Temamê rayîrşîyayîşî de, keyeyî fotografê tutanê xo yê tepişteyan berz kerdî û girseyî bêmabêne sloganê “Ma tepişteyanê xo wazenê” berz kerd.

	 

	Dima ke karwanê rayîrşîyayîşî resay Meydanê Aştîye, uca de semedê yadkerdişê şehîdan deqeyêk rêze ame girewtiş. Dima Hemserekê Meclîsê Keyeyê Şehîdan ê Kobanê Mihemed Bozî eşkerayîyêk da. Bozî qiseykerdişê xo de bale ant pêkerdişê bîyaye û waştişê caardişê aye ant û wina va: “Heta nika tutanê ma destê Hukmatê Demkî ya Sûrîyeyî de tepişte yê. Goreyê peymana mîyanê HSDyî û Hukmatê Demkî de, ganî tepişteyanê ma lezkî bêrê veradayîş. Ma rêveberîya xo dir bawer ê û zanê ke ê şev û roje semedê dosyaya şervanê ma yê tepişte têkoşîn kenê.”

	 

	Çalakîya şarî û keyeyî, bi berzkerdişê sloganê “Şehîd Namirin” û “Ma tepişteyanê xo wazenê” peynî bî. Şarî va ke heta aqubetê tepişteyan eşkera bibo û ê agêrê keyeyê xo, çalakîyanê înan do dewam bikero.​​​​​​​​​​​​​​​​