Adalet Kaya: Ganî mergê cinîyan bêrê cigêrayîş 

2026-04-21 10:30:33


	 

	AMED - Parlamentera DEM Partîye ya Amedî, Adalet Kaya derheqê dewaya Gulistan Dokuye de va: “Ganî her merdişê yew cinîye ke hewl yeno dayîş sey xokiştişî bêro nimitiş, bi baldarî bêro cipersayîş.”

	 

	Polîtîkaya bêcezaverdayîşî yê dergdemî derheqê vînîbîyayîşê Gulistan Dokuye, wendekara Beşê Averşîyayîşê Tutan ê Zanîngeha Mûnzûrî, demê peyêne de rojeve de ya. Gulistan Doku Dêrsim de 5ê çeleyê 2020ine de ameye vînîkerdiş û a roja ra agahî aye ra nêameye girewtiş. Çarçeweya cipersayîşî de, 14ê nîsane de 13 kesî bajarê cîyayan de ameyî destbendkerdiş û ameyî Dêrsim. 10 kesî înan ra ameyî tepiştiş. Walîyê verên Tuncay Sonel zî ame destbendkerdiş. Dimayê nê destbendkerdişan nêrazîbîyayîşê şarî zêde beno.

	 

	Parlamentera Partîya Têduştî û Demokrasîyê Şaran (DEM Partî) ya Amedî, Adalet Kaya averşîyayîşanê peyînî ser o qisey kerd.

	 

	‘Bi xêrê piştîdayîşê rayepêroyî û têkoşînê keyeyî dewa resaya na sewîya’

	 

	Adalet Kaya dîyar kerd ke dewaya Gulistan Doku, her çiqas derg bibo zî, resaya na sewîya û bi xêrê piştîdayîşê xurtî yê rayepêroyî û têkoşînê keyeyî dewa resaya na sewîya. Adalet Kaya va: “Ma musenê, Gulistane hetê lajê walîyî ra ameye qetilkerdiş. Derheqê nê de eşkerayîyêka îtirafkerdeyî est a. Dosya de şahido nimite zî est o. Bêguman, no destpêk, na gama verêne, ganî bêro hîrakerdiş. Bi aşman gole de cigêrayîşî ameyî kerdiş; ma o wext zanayîne û ma israr kerd ke Gulistane a gole de nîya. Keyeyê aye zî eynî çî va. La ewro ma musenê ke îdîayê zaf cidî, sucdarîyê zaf cidî est ê. Walî bi hawayêk SIM kartê Gulistan Dokuye bidest kerd û mesajê aye pak kerd, tomarê nêweşxaneyî aye pak kerd, dîmenê kamerayan pak kerd; ey nê çîyan bi tîmêk kerd. Ma heme şahidîya nê kerdî.”

	 

	‘Ganî merdişê her cinîye bêro cipersayîş’

	 

	Adalet Kaya dîyar kerd ke dimayê nê prosesî ganî dewa bi hawayêk zelal bêro îdarekerdiş û va ke 6 serrî hewl ame dayîş ke dewa bêro nimitiş û zaf gamî ameyî eştiş ke delîlî bêrê nimitiş. Adalet Kaya va: “Cenazeya Gulistane ameye vurnayîş, definkerdiş, vetiş û cayêk bîn rê ameye neqlkerdiş. Ganî heme berpirsîyarê pêroyî ke berpirsîyarê nê hemine yê lezkî bêrê muhakemekerdiş. Ganî ê hesab bidê. Dewaya Rojîn Kabaîşe, Rojwelat Kizmaze û Rabia Naze zî est a. Ma nika zanê ke nê dosyayî hetê kesanê ke sektorê pêroyî de îqtîdar bidest kerdî ra ameyî girewtiş û hewl ame dayîş ke sey xokiştişî bêro mojnayîş. Ganî no fehm bivurîyo. No fehm wina vurîyeno: Ganî merdişê her cinîye ke hewl yeno dayîş sey xokiştişî bêro mojnayîş, bi detay bêro cipersayîş. Ganî edlîye nika no bikero.”

	 

	‘Ganî bêcezaverdayîş û polîtîkayê şerê taybet peynî bibê’

	 

	Adalet Kaya dîyar kerd ke ganî polîtîkayê bêcezaverdayîşî û şero taybet tewr lezkî peynî bibê û va ke cinîyan êdî tehemmulê polîtîkayê bêcezaverdayîşî nêkenê û ê têkoşînê xo domnenê. Adalet Kaya wina dewam kerd: “Ma vanê ganî mekanîzmayê vernîgirewtişî bêrê caardiş û ganî modelêk sîstemê perwerdeyî yê bi tesîrî û qerardarî yê ser bingehê cinsîyetî mîyanê sîstemê perwerdeyî de bêro berarfiş. Problemêk bîn zî praktîkê edlîye yê. Bêguman, ganî nê polîtîkayê bêcezaverdayîşî nika peynî bibê û ma vanê ke ganî heme dosyayî ancî bêrê akerdiş û sifirî ra bêrê cipersayîş. Ganî îfadeyê heme sucdaranê, yanî heme gumanbaran, ancî bêrê girewtiş. Ganî delîlî ancî bêrê cipersayîş û ma vanê ganî nê ancî bêrê cipersayîş.”

	 

	‘Ma do têkoşînê xo her wareyî de hîra bikerê’

	 

	Adalet Kaya dîyar kerd ke ê tena semedê Gulistan Doku nê, la semedê heme cinîyanê ke ameyî qetilkerdiş û vînîkerdiş her wareyî de têkoşîn kenê û va: “Ganî cimat û cinî bizanê ke ê binê tehlukeyî de yê. Ez wazena vajî ke no bazirganîya merdiman hetê dewlete ra nîno dîyayîş. Ma do têkoşînê xo hemverê nê bidomnê. Ma do têkoşînê xo hemverê çerxê tîryakî û fihûşî hîra bikerê. Ma eşkenê vajê ke ma do kampanyayê xo yê hişyarkerdiş û yê tewr muhîm zî, têkoşînê xo ya sîyasî hemverê şantajê cinîyan ser o, şîdetê ke tutî te dir rî bi rî manenê, şîdetê ekonomîkî, şîdetê psîkolojîkî û şîdetê dîjîtalî hîra bikerê.”