Gemlîkî ra veng dayî: Ganî lezkî Abdullah Ocalan azad bibo  

2026-04-22 10:35:29


	 

	 

	Rozerîn Kurt

	 

	BURSA - Cinîyê ke çarçeweya azadîya fîzîkî ya Rayberê Şarê Kurdî Abdullah Ocalanî de Gemlîkî de ameyî têhet, semedê azadîya fîzîkî ya Rayberê Şarê Kurdî Abdullah Ocalanî veng dayî.

	 

	Têgêrayîşê Cinîyanê Azadan (TJA) bi sloganê “Demê cinîye, demê bi serkêşîya azad û azadîye dir o” çarçeweya azadîya fîzîkî ya Rayberê Şarê Kurdî Abdullah Ocalanî de 19ê nîsane de ver bi Gemlîkî rayîrşîyayîş organîze kerd. Cinîyan ancî azadîya fîzîkî ya Abdullah Ocalanî ardî ziwan.

	 

	Cinîyê TJAyî yê ke şîyî Gemlîk, waştişê azadîya fîzîkî ya Abdullah Ocalanî kerdî.

	 

	‘No rayîrşîyayîş semedê azadîya Abdullah Ocalanî û cinîyan o’

	 

	Arzu Karaman a ke Amed ra şîya Bursa dîyar kerd ke verê Riha de vindertî û va: “Ma sey cinî semedê azadîya Abdullah Ocalanî ameyî Gemlîk. No rayîrşîyayîş tena semedê azadîya Abdullah Ocalanî nîyo, semedê azadîya şaran û cinîyan zî pê ame. Ma cinî kelecan ê. Semedo ke proses bi hawayêko rind biherikîyo ma nê rayîrşîyayîşî organîze kerd.”

	 

	‘Ma azadîya serekê xo wazenê’

	 

	Saadet Dogma a ke Geverî yê Colemêrgî ra ya tewrê rayîrşîyayîşî bî va ke semedê Prosesê Aştî û Cimatê Demokratîkî kewtî rayîr û wina va: “Serekê ma prosesêk da verê ma. Dewlete dir pêkerdişêk ame kerdiş la dewlete game nêeşta. Ganî lezkî berê zîndanan bêrê akerdiş. Ganî tepişteyî azad bibê. Ma dayîkî semedê aştîye do heta peynîye têkoşîn bikerê. Ma wazenê serekê ma lezkî bêro veradayîş. Eke serekê ma azad nêbo ma zî azad nîyê.”

	 

	‘Azadîya Ocalan azadîya cinîyan a’

	 

	Parlamentera DEM Partîye ya Mêrdînî Berîtan Guneş Altun zî dîyar kerd ke ê bi îradeyê cinîyan ewro Gemlîk de yê û wina dewam kerd: “Şarê kurdî her wext waştişê azadîye semedê Birêz Ocalanî israr kerd. Tu wext no waştiş qels nêbî. Cinî zanê ke azadîya Birêz Ocalanî azadîya cinîyan, ciwanan û cimatî ya.”

	 

	Zîlan Ozturk zî dîyar kerd ke ê Stenbol ra tewrê rayîrşîyayîşê Gemlîkî bîyî û nê ercnayîşî kerd: “Zaf bajaran ra cinî ameyî. Azadîya serekê ma semedê ma muhîm a. Semedo ke azadîya serekê ma pê bêro ma ameyî Gemlîk.”

	 

	Gulşen Karasu a ke Stenbol ra ameybî zî wina va: “Azadîya Birêz Ocalan azadîya şarê kurdî ya. Ma semedê azadîya ci ewro tîya yê. Ma ewro bi nê waştişan bi hezaran hevalê cinîyan ameyî têhet.”

	 

	‘Mîmarê aştîye Îmrali yo’

	 

	Hatîce Oncu a ke Mêrdîn ra tewrê rayîrşîyayîşî bî zî nê ercnayîşî kerd: “Sey ke ma sloganê xo de zî dîyar kerd, mîmarê aştîye Îmrali yo. Ma mektube û gulanê xo Birêz Abdullah Ocalan rê şirawit. Ma ancî vanê, ganî lezkî azadîya Abdullah Ocalan pê bêro.”

	 

	Cinîyêka bîn a ke Stenbol ra ameybî zî va ke ê semedê azadîya Rayberê Şarê Kurdî Abdullah Ocalanî rayîr ra şinê û va ke heta biresê armancê xo do bi qerardarî têkoşînê xo bidomnê.