Heyetê Îmraliyî do roja çarşeme pêvînayîşêk krîtîk bikero 2026-07-13 14:51:06   ANQARA - Heyetê DEM Partî yê Îmralîyî do roja Çarşeme derheqê prosesê Aştî û Cimatê Demokratîkî de Serekê Meclîsî Numan Kurtulmuş û Wekîlê Serekê Pêroyî yê AKPyî Efkan Ala dir pêvînayîş bikero.   Prosesê Aştî û Cimatê Demokratîkî hewteyêko krîtîk de yo. Yeno pawitene ke mîyanê hewteyî de averşîyayîşê muhîmî rî bidê. Çimê raya pêroyî zî meclîs û pêşnîyazîyê qanûnê çarçewa de yo. Serê pêşnîyazê qanûnê çarçewa de munaqeşeyî dewam kenê. Kabîneyê Serekkomarîye ke ewro bi serekîya Serekkomar Tayîp Erdoganî kom beno zî do yew rojeve ci pêşnîyazê qanûnê çarçewa bo. Yeno pawitene ke sereyê pêşnîyazê qanûnê çarçewa de roniştîşê kabîneyî de munaqeşeyî bêrê kerdene û dima ra zî pêşnîyazî partîyanê sîyasîyan rê bêro şirawitene.   Goreyê agahîyanê ke îdarekarê DEM Partî ra ameyî girewtene; Heyetê DEM Partî ya Îmraliyî do roja çarşeme Serekê Meclîsî Numan Kurtulmuş û Wekîlê Serekê Pêroyî yê AKPyî Efkan Ala dir pêvînayîş bikero. Rojeve sereyîn yê nê pêvînayîşan zî pêşnîyazîyê qanûnê çarçewa yo û do munaqeşe û qiseykerdiş serê ci bêrê kerdene. Îdarekarê DEM Partî dîyar kerdî ke ganî qanûnê çarçewa mîyanê endamanê rêxistine de nêro kategorîzekerdiş û sey ke pêvînayîşê 24ê gulane de Rayberê Şarê Kurdî Abdullah Ocalanî dir ameyo muzakerekerdiş bêro rojeve.   Heto bîn ra zî yew rojeva sereyîn yê prosesî zî şîyayîşê Heyetî yo ke semedê Girawa Îmraliyî û pêvînayîşê Rayberê Şarê Kurdî Abdullah Ocalanî dir o. Heyetê DEM Partî tewr peyên 24ê gulane de Abdullah Ocalanî dir pêvînayîş kerd û na roje ra dima tu pêvînayîşî nêbî. DEM Partî û KCK zî rexneyan îqtîdarî rê kenê û vanê ke verê pêvînayîşî de astengî est ê û vera nê nêrazîbîyayîş mojnenê.   Dimayê averşîyayîşê nê hewteyî yeno pawitene ke dimayê pêşnîyazê qanûnê çarçewa hetê kabîneyê Serekkomarîye ra ame munaqeşekerdiş, partiyanê sîyasîyan rê bêro şirawitene û dima ra zî Heyetê DEM Partî şêro Girawa Îmrali û fikrê û pêşnîyazê Rayberê Şarê Kurdî Abdullah Ocalanî bigîro û raya pêroyî dir pare bikero.