Hunermendê Kurdî: Adresê çareserîyî Îmrali yo

  • 09:30 19 Gulane 2022
  • NAROJANE
Marta Somek 
 
STENBOL  - Hunermendê Kurdî dîyar kerdî ke duştê hêrişê AKP-PDKyî de, Şarê Kurdî do reyna bi ser kewo û vatî: "Her ke tecrîd giran beno hêrişî zî pîl benê. Di nê prosesî de xebata tewr pîl caardişê azadîya Serekîyî ya. Serekî azad bibo do Şarê Kurdî zî azad bibê. Çareserîyî Îmrali yo." 
 
Hêrişê AKP-MHPyî yê bi paştgirewtişê Partîya Demokratîke ya Kurdistanî (PDK), 17ê Nîsane de hemverê Mintiqaya Federe ya Kurdistanî de ameyî destpêkerdiş, domnenê. Hemverê Zap, Metîna û Avaşînî de bombevaranî dewam kenê. Her hetî ra zî reaksîyonî yenê mojnayîş û welatê Ewropayî de beyanatî yenê dayîş û hunermendî zî duştê hêrişan de reaksîyonê xo ardî ziwan. 
 
Hunermendan derheqê hêrişan de ajansê ma rê qisey kerd û dîyar kerdî ke no îşxalkerdiş o, her ke tecrîd giran beno hêrişî zî pîl benê. Hunermendan sewbîna beyanat kerdî ke, nê prosesî de xebata tewr pîl azadîya Serekîyî ya. 
 
'Dinya bêveng a' 
Hunermende Nûarîne bale ante serê hêrişê ke yenê ca û vat: "Dewlete ya faşîste û îşxalkerdoxe ya Tirkîya her çar perçeyê Kurdistanî de bi hêriş û kayê lîşinî wazena qirkerdişêke bîyaro ca.  Hewl dana ciwanan ê Kurdan qir bikero. Wazena Şarê Kurdî çinî bikero. Duştê nê hêrişan de gerîlla xoverdayîşêke pîl mojneno ra.  Do nê kayê lîşinî tal vejîyê. Ganî ma zî  xoverdayîşê gerîllayan de înan tena nêverdê. Coka no ne tena bar, mîsyon û karê gerîllayî yo. Ganî ma aktîf di nê prosesî de ca bigîrê. Ganî ma tewirê çalakîyan bibê û kayan tal vejê. Coka nika heme dinya beveng a, benê hetkarê nê kayê lîşinî." 
 
'Do xoverdayîşê gerîlayan qezenc bikero' 
 
Nûarîne da zanayene ke heme dinya duştê Şarê Kurdî de ya wina dergî da qiseyanê xo: "Vera nê ganî ma zêdeyêr wayîr ro xo vejîyê. Eke yewîyîye bibo do Şarê Kurdî biserkewo. Bi serran o xoverdayîşê Şarê Kurdî û gerîllayan qezenc kerd. Di nê  prosesî de zî do wina bo. Do dewlete ya îşxalkerdoxe apey şêro. O tewr zêde Şarê Kurdî dejineno hetkarîya PDKyî yo. PDK pêwa neyarîya Kurdan ca gêno û di hêrişan de beno hetkar. Hewl dano ke gonîya wayan û biranê xo birişno. Qirkerdişê gerîllayan yeno mehnaya qetilkerdişê her çar hetê Kurdistanî. No nêbeno bêro qebûlkerdiş. Ganî PDK Şarê Kurdî ra efû biwazo." 
 
'Çi destê ma ra bêro ganî ma bikerê' 
 
Nûarîne,  dîyar kerd ke ganî PDK seba serkewtişê Şarê Kurdî têkoşîn bikero û wina qal kerd: "Gerîlla seba her çar perçeyê Kurdistanî têkoşîn kena. Vera nê veng ê ma no yo ke ganî lezkî na şasîyî ra agêro. Ganî PDK seba azadîya Şarê Kurdî têkoşîn bikero. No şerê bîyayîş û çinîbîyayîşî yo. Eke ma azadîyî biwazê ke ganî ma zêdeyêrî têkoşîn bikerê. Çi destê ma ra bêro ganî ma bikerê. Ganî hetkarîya PDKyî bêro teşhîrkerdiş û lezkî na şaşîyî ra bêro agêrayîş." 
 
'Çareserî Serekî yo' 
 
Nûarîne peynîyê qiseyanê xo de no veng kerd: "Tecrîdo ke serê Serekîyî de her ke şino giranêr beno û vera nê zî hêrişî pîl benê. Yewin çîyo ke nê prosesî bêrê kerdiş caardişê azadîya Serekîyî yo. Ganî ma vîrî ra nêkerê. Azadîya Serekîyî Azadîya şarê Rojhelatê Mîyanînî ya. Çareserî Serekî ya. Ma veng ro şarê xo kenê ke çi destê înan ra yeno wa bikerê. Wa tewirê xebatan û çalakîyan bibê. Serkewtiş do yê Şarê Kurdî bo. Biciwîyo xoverdayîşê gerîllayî!" 
 
'Ma no şêro lîşin bidê vindarnayîş' 
 
Hunermende Canê zî hêrişê artêşe ya Tirkî şermezar kerdî û wina nîyadîyayîşê xo ardî ziwan: "Dewlete ya Tirkî duştê gerîllayî de hêrişêke verhîra û lîşin fînaya ciwîye û wina ci de şî: "Ez nê şerê lîşinî şermezar kena. Veng ro Şarê Kurdî kena. Veng ro çar perçeyê Kurdistanî kena. Bêrê ma dest bidê yewbînan û seba yewîyîya xo ya neteweyî bêrê têhet.  Ma nê şêrê lîşinî vindarnê. Ma duştê şerî de vinderê ke wa gonîya gerîllayî nêrişîyo. Eke gonîya gerîllayan birişîyo, do yê her çar perçeyê Kurdistanî zî birişîyo. Dewlete ya Tirkî wazena bi gonîya Şarê Kurdî bireso amancê xo. Ez veng ro Kurdan kena, yewîyîya xo awan bikerê, nêrê kayanê lîşinan ê  Erdoganî. Ganî ma gerîllayî tena nêverdê. Serkewtişê  gerîllayî  serkewtişê Şarê Kurdî ya."