Tepişteya nêweşe ya giran Fatma Tokmake binê tecrîdî de yena tepiştiş

  • 14:47 27 Çele 2023
  • NAROJANE
 
STENBOL - Tepişteya nêweşe ya zerrî Fatma Tokmaka ke rewşa aye her ke şina giran bena vera ke heta ewro xeylê reyan muracatê ATKyî kerda zî eynî cewaban girewta: “Eşkena tepişte bimana.”
 
Hemverê tepişteyanê nêweşan de polîtîkayê taybetî yê şerî yenê rayraberdiş. Polîtîkayê ke yenê rayraberdiş benê sebebe mergê tepişteyan. Înan ra yew zî tepişteya binameyê Fatma Tokmake ya. Fatma Tokmake serra 1996î de Kocaelîyî de ameye destbendkerdiş û 20 rojî tewrê domanê xo yê di serre û nîme yê bi nameyê Azadî îşcende dî û 20 serrî yo ke zindan de tepişte ya. Fatmaye nêweşa zerrî ya giran a. Seba ke gonî nêşina zerrîya aye ganî hewte de reyêk gonîya aye bêra bedelnayîş. Sewbîna nêweşîya şekeri zî aye de esta û hetê girewtişê nefesî de zehmetî ancena. Fatmaye binê şertanê giranan de yena verdayîş û binpaykerdişê heqan reyde rî bi rî yena verdayîş. 
 
Fatma nîna tahlîyekerdiş 
 
Vera nêweşîya girane Fatma zîndanê Cinîyan yê Bakirkoyî de binê tecrîdî de yena verdayîş. Hemsereka Pêroyî ya Komeleya Heqanê Merdiman (ÎHD) Eren Keskîna ke avukata Fatmaye bî dîyar kerd ke raporo ke Dezgehê Tibê Edlî (ATK) dano bêhuqûqî yo û wina vat: “Fatma wexto ke tepişte bî pê raporê ATKyî ameye verdayîş. La eynî dezgehe ke verê cû vatbî Fatma nêweş a, bado ke ceza ame tesdîqkerdiş ma muracatê taloqkerdişê înfazî kerd la ewro raporê ‘eşkena tepişte bimana’ dano. TÎHVî raporê ‘nêeşkena tepişte bimana’ da. La ATKyî çi heyfo ke seba tepişteya sîyasî qerarê tebere etîkî dano. Fatma Tokmaka ke nêweşa giran a serbest nîna verdayîş.” 
 
Îşkenceyo bi kelepçekerde
 
12ê çeleyê 2022î de seba ke degerê gonîye yê Fatmaye de bedelnayîş estbî doktorê Nêweşxaneyê Dr. Sadî Konukî yê Cigêrayîş û Perwerdeyî û Nêweşîyê Sîneyî dîyar kerdbî ke ganî Fatmaye tesilî şêra nêweşxaneyî. La wexto ke Fatmaye benî nêweşxane wazenê bi zorî aye pê kelemce gire bidî livînî.  Fatmaye na rewşe qebul nêkena û aye benî zindan. Eynî roje reyna nêweş kewena û benê nêweşxane, gonîya aye bedelnenî. Dima ra zî reyna benê zîndan û embazêk aye reyde kene karantîna. 
 
Muxatab çinî yo 
 
Avûkatanê aye ra Jîyan Kayaye dîyar kerd ke pêvînayîşo akerde yê 26ê çeleyî de Fatma nêvejîyaya revîr û derheqê talebanê înan de tu muxatabêk çinî yo.
 
Rapor TÎHVî de yê
 
Raporê derheqê rewşa Fatmaye Weqfê Heqanê Merdiman yê Tirkîya (TÎHV) de yî. La sebake butonê lezgînî yê zîndanan girewtî û hem zî agêrayîşê nêweşxaneyî de 14 rojî karantîna esto û nêweşîyaê xo vera Fatma nêeşkena tena bimana, nêwazena şêra ATKyî.  
 
Muracatê ATKyî û netîceyê ci
 
Avûkatê Fatmaye gulana 2022î de reyna muracatê ATKyî kerdî û 10 rojî bi maben berdî ATKyî. Rapor 13ê Hezîrana 2022î de vejîya û derheqê Fatmaye de qerarê ‘Fatma eşkena tena cuya xo îdame bikera’ ame dayîş. 
 
Nêeşkena rayîra ra şêra 
 
Aşma êlula 2022î de mudirê zîndanî bedelîya û bi na rewşe binpaykerdişî vejîyayî merheleya tewr core. Ama zanayîş ke Fatmaye no donemî de zehmetîya nefesgirewtişî ancena. 
 
Vengdayîş dewam kenê
 
Komîyonê Zîndanan yê ÎHDyî yê Stenbolî seba baleantişê rewşa Fatmaye her hewte ‘Roniştişê Fyî’ pê ano û avûkatê Fatmaye û rayaumûmîye zî seba serbestveradayîşê Fatmaye vengan kenî.