Şarê Mexmûrî vera tecrîdî de rayra şî

  • 13:51 8 Hezîrane 2023
  • NAROJANE
 
 
MERKEZÊ XEBERAN - Şarê Kampa Mexmûrî vera tecrîdo girankerde û cezaya disiplînî yê serê Rayberê PKKyî Abdullah Ocalanî de yeno rayraberdiş, rayraşîyayîşêk girseyî viraşt. Rayraşîyayîş de seba wedarnayîşê tecrîdî vengê lezkî ame akerdiş.
 
Şarê Kampa Multecîyan ya Şehîd Rûstem Cûdî (Mexmûr) vera tecrîdo girankerde û cezaya disiplînî yê serê Rayberê PKKyî Abdullah Ocalanî ke 27ê Nîsana 2023yî de ame birnayîş de rayraşîyayîşêk girseyî viraşt.
 
Rayraşîyayîşê şarî Kampa Mexmûrî de bi kombîyayîşê hemwelatijanê kampe reyde, verê Dezgehê Keyeyê Şehîdan de dest pêkerd û heta Parka Şehîd Aryen Cûdîye dewam kerd.
 
Rayraşîyayîş de sloganê ‘Bê Serek cuye nêbena’, ‘Biciwîyo Xoverdayîşê Îmrali’ ameyî berzkerdiş. Heto bîn de fotograf û postere Rayberê PKKyî Abdullah Ocalanî ameyî berzkerdiş.
 
Wexto ke girseyê rayraşîyayîşî resa Parka Şehîd Aryen Cûdîye seba pêro şehîdanê Têkoşînê Azadîya Kurd yew deqe rêz ame girewtiş. Serê nameyê şarê kampe Endama Komîteya Karê Teberî ya Meclîsê Îştarî ya Kampe Leyla Îlhane eşkerayîyêke wend.
 
Leyla Arzu Îlhane dîya kerd ke ê sey şarê Kampa Mexmûrî tecîrd û cezaya dîsîplînî yê serê Abdulah Ocalanî bi şîdetin şermezar kenê û wina dewam kerd: “No di serrî ra zêde yo ke Rayber Apo ra xebere nîna girewtiş. Hêzê îqtîdarî niha bi adirî reyde kay kenê. Çike sîstemê kapîtalîst ke tîya ra 300 serrî verê cû ameybî awankerdiş, ver bi çinîbîyayîşî de yo. Keso ke alternatîfê nê sîstemî awan kerdo û mîyanê komelî de azadê û têduştî ronayo raşte Rayber Apo yo. Rayberî planê lêşin yê hêzê îqtîdarî yê serê şarê kurdî û Rojhelatê Mîyanenî pûç kerd.” 
 
Leylaye dewamê eşkerayîye de wina vat: “Rayber Apo bi paradîgmaya xo azadî, têduştî û alternatîfê sîstemî yê îqtîdarî da awankerdiş. Ewro hêzê Rayber Apo her cayê dinya de vera sîstemê îqtîdarîye de têkoşîn dano. Sîstemê îqtîdarî hêzê Rayber Apoyî ra terseno. Coka ra her ke şino tecrîdî giran keno. Bi bahaneyanê bîla sebeban û bê huqûqî cezaya dîsîplînî Rayber Apo rê yena birnayîş. Ma sey şarê kurdî nê caardişan qet û qet qebul nêkenê.”
 
Leylaye ard ziwan ke şarê kurdî bi wesîleya fikir û felsefeya Rayber Apoyî wayîrê îradeyê xo vejîya û wina qiseykerdişê xo peynî kerd: “Ma venga şarê kurdî û dezgehanê mîyanneteweyîyan kenê ke vera tecrîd û îşkenceyê serê Rayber Apoyî de bibê wayîrê reaksîyon. Rayber Apo xeta sûre yo. Coka ra ganî bi lez tecrîd bêro şikitiş û peynîya sîstemê îşkenceyê Îmraliyî bêro. Ma sey şarê wayîrê wijdan û wayîrê ercî, ganî dormeyê Rayber Apoyî de bibî xelek û wayîrê Rayberîyê xo bivejê. Ma vanê kesêk nêeşkeno roja ma tarî bikero.”
 
Eşkerayî bi sloganê ‘Bê Serek Cuye nêbena’, ‘Kesêk nêeşkeno roja ma tarî bikero’ û ‘Biciwîyo Xoverdayîşê Îmraliyî’ peynî bî.