Buşra Turan

 

AGIRÎ - Olcay Aras a 78 serrî ya ke bi serran dibistana dewe de mamostatîye kerd, hêvîya xo ya tutîye merkezî de pê ard û kedê cinîye û cuya komelî bena tuvalê xo ser.

 

Kurdistan de merkezanê ke binê banê îdarekardişanê herêmî de falîyêt domnenê, semedê cinîyan benê cayê piştîdayîşî û berardişê kolektîfî. Olcay Aras a 78 serrî ya ke temamê cuya xo têkoşîn da, bi xêrê nê merkezan berardiş kena.

 

Olcay Aras a ke 8 serrî hem mamostatîye û hem zî mudirîye dibistana dewe de kerd, dimayê ke agêrena bajare xo Agirî, Merkezê Piştîdayîşê Cinîyanê Zin ê Şaredarîya Agirî de verê xo dano hunerê resimî. Cinîyê kedkarê ke herre ser o xebate kenê, cinîyê dewan û tutî ana tuvalê xo ser û keda cinîyan mojnena.

 

‘Ez meslegê xo ra hes kena’

 

 

Olcay Aras va ke 25 serrî mamostatîye kerd û pêwa zehmetîyan meslegê xo îcra kerd û va: “Emrêk ciwanî de teqawît bîya. Nika 78 serrî ya. Tutê mi wendî û şîyî zanîngahan. Ma ameyî nê emrî. Ma agêrayî bajare xo Agirî. Ma tîya bica bîyî. Mi 8 serrî dewe de mamostatîye kerd. Îmkanî zaf kêm bîyî. Wesayît, lojman çinbî. Ma şîyîne û ameyîne. Ez hem mudire, hem mamoste bîya.”

 

‘Manaya resimanê mi est ê’

 

 

Olcay Aras ard ziwan ke tutîye ra resiman ra hes kena û binê banê Merkezê Piştîdayîşê Cinîyanê Zine de dest bi xêzkerdişê resiman kerd û wina dewam kerd: “Resimî her wext bala mi ancenê. La îmkan çinbî. Dimayê ke merkeza Zine akerdî, ez şîya. Mi uca xo kifş kerd. Her resimêk mi de maneyêk est o. Resimanê xo de cinîyanê kedkaran, yê ke herre de xebate kenê, yê ke pesdewarî kenê, tutan xêz kena. Her yew wayîrê maneyêke yê.”

 

 

‘Huner nîmet o’

 

Olcay Aras bale ant muhîmîya yewbîyayîşê merkezê piştîdayîşê cinîyan û wina va: “Zaf cinî yenê tîya. Ma yewbînan goşdarî kenê. Ma hewcedarîyanê yewbînan goşdarî kenê. Cinî yenê tîya û meraq kenê. Vanê tîya çi yeno kerdiş. Ma înan rê vanê. Lazim o ke huner tutîye de dest pêkero. Huner nîmet o. Lazim o ke her kes hunere dir eleqedar bibo.”