MERKEZÊ XEBERAN - Kampa Bacid Kendala ya sînorê îdareyê xoserî yê Zaxoyî ser o şewat vejîya. Netîceya nê hedîseyî de di çadirê multecîyanê êzidîyê kurdî bi temamî veşayî û di cinî bi giranî birîndar bîyî.

 

Goreyê agahîyan, adir semedê temasê ceyranî virazîyayo û netîce de di çadirî bi temamî veşayî û di cinîyê ke mîyanê çadiran de bîyê veşayê û birîndar bîyê. Birîndarî berdîyayî nêweşxane; ame neqlkerdiş ke rewşa weşîya yew cinîyan ra giran a.

 

Na hedîseya şewatî reyke bîn bale ancena rewşa zehmetî ya cimatê êzidî ke 11 serrî yo kampê Başûrê Kurdistanî de binê şert û mercê tewr giran de ciwîyenê. Serra derbasbîyayî de reyan hedîseyê bi nê rengî yê şewatî kampan de rî dayê, ke no nîşanê kêmbîyayîşê asayîş û xizmetdayîşê cuyayîşî yo.

 

Erjê vîrardişî yo ke kampê Başûrê Kurdistanî de zêdeyê 10 hezar koçberê Şengalî ciwîyenê. Pêwa serrî derbas benê zî heta nika rayîr nîno dayîş ke nê koçberî agêrê ca û warê xo yê Şengalî ser û bi nê rengî mîyanê cuyayîşêka nêdîyar û binê tehlukeyê rîdayîşê sey şewat û serdî de yenê verdayîş.