WAN - Hemsereka şubeyî ÎHD’yî ya Wanî Ayten Kiran dîyar kerd ke hêrişê hemverê cinîyê Rojawanî dewamê zihniyetê DAIŞî yo û va: “Ganî lezkî ablûqaya Kobanê bêro wedarnayene û wina va: “Kobanê 5 tutî serdî dinyaya xo bedelnayî. Ganî her kes wijdanê xo cipersayîş bikero. Ma heme berpirsîyarê. Berpirsyarîyê Tirkîya ke hende nêzdîyê berê sînorî yo est o.”

 

Dimayê hêrişê HTŞ û komê girêdayeyê Tirkîya yê 6ê Çeleyî de dayî destpêkerdiş, 30ê Çeleyî de peyman ame îmzakerdiş, labelê pêwa ablûqaya Kobanê roja 22yîne de dewam kena. Bajar bi birnayîşê awe û ceyranî krîzê merdimîye resa sewîyeya tewr cor. Semedê anêkerdişê berê sînorî yê Murşîtpinarî hetkarîya xida û dermanî zî yenê astengkerdiş. Hemverê nê caardişan çalakîya Tirkîya û Kurdistanî de pê ameyî de nêzdîyê 800 kesî zêdeyêr ameyî destbendkerdiş.

 

Hemsereka Komeleya Heqê Merdiman (ÎHD) ya Wanî Ayten Kiran derheqê hêrişan, nêzdîyê Tirkîya, astengkerdişê hetkarîyan de qisey kerd.

 

‘No hêrişêk topyekûn hemverê şarî yo’

 

Ayten Kiran da zanayîş ke şer binpaykerdişê heqan o û va şerê ke serdestîyê camêrdî domnenê de tewr zêde cinî û tutî mexdur benê. Ayten Kiran wina va: “Çîyê Rojawan de yenê ciwîyayene şer nîyo, ez nê rast nêvînena. Şer mîyanê dewletan de beno û heqdar nînê dîyayene zî huqûqêk dîyarkerde est o. Çîyê Rojawan de yenê ciwîyayene şer nîyo, hêrişêk topyekûn o. Mumkin nîyo ke ma behsê huqûqî bikerê. Na rewşa nika Kobanê dewamê zihniyetê DAIŞî ya. O zihniyet bi piştîdayîşê dewletanê ewro ancî hemverê kurdan prosesê îmha domneno.”

 

‘Texrîbat berardişê eynî zîhnîyetî yo’

 

Ayten Kiran dîyar kerd ke dprosesê Kobanê de bi serkêşîya cinîyan şoriş pê ame û wina va: “Semedê nê hêrişan de ewil cinî hedef yenê girewtiş. Bawerîya înan de hetê cinîyêk ra kiştiş beno sebeb ke nikewê cenet. Bedenê cinîyêk awanîye ra eştiş zihniyetê înan ke cinîyan ra terseno mojneno. Ancî birnayîşê gilayanê cinîyêka bêcan ancî nê zîhnîyetî mojneno. Na rewşe çîyê ke demê verên Wan de ameyê ciwîyayene mojna. Bedenê Ekîn Wan ame teşhîrkerdiş û no berardişê eynî zîhniyetî yo.”

 

‘Ganî Tirkîya nêbo hetê nê hêrişan’

 

Ayten Kiran dîyar kerd ke pêwa peymane Kobanê hema binê ablûqa de yo û wina dîyar kerd: “Ganî na ablûqa lezkî bêro wedarnayene. Semedê şirawitişê hetkarîyan ganî lezkî berê sînorî bêrê akerdiş. Merkezê Pêroyî ya ÎHD’yî na babete de şi Pirsûs û eşkerayîye da. Helwestê ma zelal o; ganî berê sînorî lezkî bêrê akerdiş. Ablûqakerdişê merdiman merdimîye nîyo. Hemverê huqûqê mîyanneteweyî yo. Îmhakerdişê dibistan û nêweşxaneyan, hêrişê cinî û tutan ser destdergkerdişê cinî û tutan merdimîye nîyo. Kobanê de 5 tutî serdî ra dinyaya xo bedelnayî. Ganî her kes wijdanê xo cipersayîş bikero û ganî berê sînorî yê Murşîtpinarî bêro akerdiş. Ganî heme pawitoxê heqê merdiman reaksîyonê nê bimojnê.”