ANQARA - Cinîyê ke bazar ra dest veng agêrenê dîyar kenê ke krîzê ekonomî şîdetê mîyanê zereyî de zêde keno û vatî ke semedê problemê ekonomî nêzanê çi werd viraznê. Cinîyan vatî ke çimeyê probleman krîzê ekonomîye yo.

 

Tirkîya de semedê krîzê ekonomî standardê cuya merdiman her şino xerab beno. Sebebê şîdetê ke her şino zêde beno krîzê ekonomî yeno dîyayîş. Krîzê ekonomî, beno sebebê bêxebatî, feqîrî û şîdetî. Cinîyanê qezaya Tuzluçayîrî ya Anqarayî şîyî bazar, dîyar kerdî ke semedê krîzê ekonomî zereyê keyeyî de hetê psîkolojîkî ra tesîr beno.

 

‘Yê ke hewcedarê nanîyê est ê’

 

Nerîman Uygar va ke semedê zêdebîyayîşê vayî tena bazar de gêrenê û hema çîyêk nêgirewtê û ê dest veng agêrenê. Nerîman Uygar wina ard ziwan: “Sebzeyo tewr erjan 25 lîra yo. Semedê ke ma nêeşkenê çîyêk bigîrê nêzanê çi viraznê. Ma teqawît ê, qîm nêkeno. Do qîmê kamî bikero? Her çî vay bîyo. Hêê girewtişî nêmend. Heta no kesê serê ma nêşêro çîyêk rast nêbeno. Kam beno wa bibo wa yewêk baş bêro. Kesê ke hewcedarîya înan bi nanî est a, est ê.”

 

Krîzê ekonomî sey şîdet agêreno

 

Cinîya ke nêwaşt nameyê xo bido wina ard ziwan: “Ma ameyî gêrenê, ma do çi bigîrê? Ma dest veng agêrenê keye. Do tutî çi biwerê? Yê ke bifikrîyê çin ê. Ancax kîloyêk çîyêk yeno girewtiş. No krîz tesîrê her kesî ser o kerd. Ma zî baş ê, yê ke ekonomîya înan xerab bîya çi kenê. Senîn ciwîyenê. Rewşe zaf zehmet a. Keye de pêrodayîşî pê yenê. Rewşa cinîyan hîna giranêr a. Pabebîyayîşê mêrdan zêde yo. Semedê krîzî pêrodayîşî vejîyenê. Merdimî yenê bazar, çîyêk nêşenê bigîrê. Keyeyî de kewenê stres. Lazim o şar tercîhê xo rind bikero. Rewşe her şina xerab bena. Şer vejîyeno. Lazim o şarî yew bibê û çareserîya xo bi xo viraznê.”

 

‘Wina şêro do merdimî vêşanî ra bimirê’

 

Gulseren Demîrcan zî dîyar kerd ke her çî vay o û wina dewam kerd: “Ez semedê xo gêrena. Ma nêşenê çîyêk bigîrê. No şar do vêşanî ra bimiro. Wa her kes yew bibo. Heta şan de fikirîyena ke çi werd viraznî. Eke ma çîyêk nêgîro ma do senîn werd viraznê. Her çî vay o. Na bêwijdanî ya. Binê 100 TLyî de çîyêk çin o. Ma nêzanê keyeyê xo de çi werd viraznê. Yo tewr erjan makarna yo. Sewbîna çîyêk nîno girewtiş.”

 

‘Meaşê asgarî qîmê kîra nêkeno’

 

Zohre Kir zî va ke vayî di qatî bîya û wina dewam kerd: “Ma semedê ekonomî probleman ciwîyenê. Kewenê stres ke şan de çi werd viraznê. Zafê pêrodayîşê mîyanê keyeyî, semedê çinbîyayîşî yo. Kîra vay ê. Meaşî kêm ê. Meaşê asgarî kîra rê qîm nêkeno.”

 

‘Ma rewşêke zehmetî de yê’

 

Cinîya ke nêwaşt nameyê xo bido dîyar kerd ke aye teqawît a û her çî vay o û wina dewam kerd: “Marulêk 80 lîra yo. Ma nêzanê çi werd viraznê. Yê ke tutanê înan est ê Homa hetkar bo. Sebebê krîzî yê sereyê na dewlete yê. Ê rehet ê la ma rewşêk zehmetî de yê.”

 

‘Ma perîşan bîyî’

 

Çîçek Kocaoglu zî va ke aye destê xo veng agêraya û nê semedî ra keyeyî de aramî nêmenda û wina qedêna: “Ma yenê bazarî nêşenê çîyêk bigîrê. Zemanê teqawîtan nêdayî. Ma perîşan bîyî. Hukmat rindî nêyeno îdarekerdîş. Fikirê ke wina kesêk ma ser o esto, her çî xeno, şeno, bi xo ra keno. La şarî ji birçîyayîşî merno. Ganî no hukmat bivurîyo, bivurîyo beno ke her çî sererast bibo.“​​​​​​​​​​​​​​​​