AGIRÎ - Çîgdem Gur va ke semedê çareserîya demokratîkî ya problemê kurdî û awankerdişê aştîya komelî azadîya fîzîkî ya Rayberê Şarê Kurdî Abdullah Ocalanî mecburî ya û wina va: “Birêz Ocalan tena şexsêk nîyo, mifteyê çareserîya krîzê Rojhelatê Mîyanênî yo. Nê semedî ra ganî lezkî qerarê DHMEyî pê bêrê û çarçeweya heqê hêvîye de şertê azadîya fîzîkî pê bêrê.”

 

Nê prosesî de ke sîyasetê dinya û dengeyê Rojhelatê Mîyanênî ancî yew rey şekil gêno, awankerdişê modelê “cimatê demokratîkî” yew mifteyê esasî yê aştîya herême vejîyeno vernî. Pêwa qerarê DHMEyî yê heqê hêvîyeyê ke semedê Rayberê Şarê Kurdî Abdullah Ocalanî ame dayîş, Tirkîya qerar nêkerd cuye.

 

Hemsereka Partîya Têduştî û Demokrasîyê Şaran (DEM Partî) ya Agirî Çîgdem Gur, derheqê Vengê Aştî û Cimatê Demokratîkî de ercnayîş kerd.

 

‘Aktorê prosesî Birêz Abdullah Ocalan o’

 

Çîgdem Gur va ke Rayberê Şarê Kurdî Abdullah Ocalan mifteyê tewr pîl ê çareserî û prosesî yo û wina va: “Vengdayîşê Cimatê Demokratîkî ra bigîre heta feshkerdişê PKKyî, qerarê bêçekbîyayîşî ra bigîre heta veşnayîşê çekan û zaf qerarê bînan Îmraliyî de da. Partîya ey zî esasê gamê peyêne de yew hetî game eştî. Semedê samîmîyet û bawerîye ganî azadîya fîzîkî ya Abdullah Ocalanî pê bêro. Muxatabê prosesî Abdullah Ocalan o. Nê hetî de ganî şertê azadî de xebatanê xo bidomno.”

 

‘Ganî dewlete gamanê somutî bierzo’

 

Çîgdem Gur dîyar kerd ke hukmat û dewlete erey mendê û wina va: “Semedê ke azadîya fîzîkî ya Birêz Ocalan pê bêro ganî zemînê sîyasî û huqûqî bêro awankerdiş. Ganî dewlete goreyê vengdayîşê Birêz Bahçelî têbigêro û azadîya fîzîkî pê bîyaro, semedê nê hewldayîşê zemîna huqûqî û sîyasî nîşan bido. Qasê cesaretê mîyanê şerî de ganî mîyanê aştîye de zî israr û cesaret bibo. Aştîya Rojhelatê Mîyanênî, çareserîya krîzanê ciwîyayîşî manîfestoyê cimatê demokratîkî û mîmarê ci bi azadîya Birêz Ocalanî mumkin o.”

 

‘Birêz Ocalan felsefe yo’

 

Çîgdem Gur peynîya qiseykerdişê xo de dîyar kerd ke Rayberê Şarê Kurdî Abdullah Ocalan yewîya neteweya kurdî xurt keno û nê semedî ra heme hetanê cimatî ra muhîm o û wina qedêna: “Azadîya Birêz Ocalan azadîya cinîyan, ciwanan û heme hetanê cimatî ya. Azadîya Birêz Ocalan çareserîya tewr pîl ê problemê Rojhelatê Mîyanênî ya. Birêz Ocalan tena şexsêk nîyo, eynî wextî de şeklê cuye û fehmê kolektîf o. Ganî lezkî qerarê DHMEyî pê bêrê û heqê hêvîye bikewê cuye.