Devrîm Findik

 

STENBOL - Dîdem Yilmaz derheqê kampanyaya “Pawitişê Esasî Dano Ciwîyayîş” yê Meclîsê Cinîyanê HDKyî ke dayê destpêkerdiş de qisey kerd û va ke pawitişê esasî hemverê her tewir şîdetê ke sîstemê mêrdan viraşto, xeta cuye ya.

 

Proseso ke şîdet û qirkerdişê cinîyan ser o her şino zêde beno, rêxistinê cinîyan pawitişê esasî sey rayîrê tewr esasî yê pawitişê cuye munaqeşe rê akerdî. Meclîsanê Cinîyanê HDKyî kampanyaya “Pawitişê Esasî Dano Ciwîyayîş” dayî destpêkerdiş û bi nê kampanya hedef kenê ke hemverê her tewir şîdetî mekanîzmayê pawitişî aver berê. Nê esasî de Verfeka Kongreya Demokratîkî ya Şaran (HDK) ya Stenbolî Dîdem Yilmaz derheqê kampanya de qisey kerd.

 

Pênasekerdişê şîdetî

 

Dîdem Yilmaz va ke pawitişê esasî hemverê şîdetê serdestê mêrdan yê 5000 hezar serrî yo dewam keno, mekanîzmayê pawitişê cuye yê cinîyan o û va: “Na mekanîzma zaf cayî de eşkena bêro akerdiş. Tîya de çîyê ke ma qal kenê tena şîdetê fîzîkî yê sîstemê serdestê mêrdan nîyo. Ma eşkenê tewirê şîdetî rêze bikerê. Hemverê nê lingan ser o mendiş, sey cinîyêka pawitişê xo kerdiş, pawitişê esasî yo. Pawitişê esasî de pênasekerdişê heme tewirê şîdetî muhîm o. Wexto ke ma vanê şîdetê mêrdan, şîdetê dewlete û wexto ke ma hemverê nê pawitişê esasî îfade kenê, bi temamî sey şîdetê fîzîkî yeno fahmkerdiş. La ma vanê ke no pênasekerdişê şîdetî rê qîm nêkeno. Ma nê hevalanê xo yê cinîyan ra vanê.”

 

‘Mekanîzmaya çareserîye pawitişê esasî yo’

 

Dîdem Yilmaz dîyar kerd ke wexto ke mêrik nêverdo cinî bixebito no tewirê şîdetê ekonomîkî yo û va: “Pawitişê esasî çira lazim o. Wexto ke mêrik nêverdo cinî hetê ekonomîkî de lingan ser o bimano no şîdetê ekonomîkî yo. Yê dîyin cinî her wext hewcedarê xo verdayîş zî şîdet o. Ganî cinî nê bizanê. Eke mêrik serdestî cinîyan ser o bikero, destûr nêdo cinîyan ke vejê teber no zî şîdetê komelî û psîkolojîkî yo. Hemverê nê mekanîzmaya çareserîye pawitişê esasî ya.”

 

‘Pawitişê esasî hewcedarî ya’

 

Dîdem Yilmaz eşkera kerd ke pawitişê esasî hewcedarî ya, meseleya cuye ya û wina dewam kerd: “Pawitişê esasî qasê nan û awe hewcedarîya esasî ya. Sebebê destpêkerdişê kampanyaya ma no bî. Armancê ma no yo ke ma pawitişê esasî cinî û ciwanan dir pare bikerê. Ma şîdet pênase kerd la hetê xopawitişê fîzîkî de no temam nêbîyo. Çiqas tewirê şîdetî est ê hende zî tewirê pawitişê esasî est ê. Parekerdiş ê şîdetî bi kesêk dir zî pawitişê esasî yo. Agahdarkerdiş ê to yê şîdetî zî pawitişê esasî yo. Yan zî persê ‘çîyêk to ser o ame, çi bî’ ke kesêk pers kerdo zî mekanîzmaya pawitişê esasî viraşto. Nê heme pawitişê esasî yê. Armancê ma no yo ke ma bi nê kampanya vajê ‘pawitişê esasî dano ciwîyayîş’. Ma veng danê heme kesî ke hemverê şîdetê mêrdan de pîya vengê xo berz bikerê.“​​​​​​​​​​​​​​​​