MERKEZÊ XEBERAN – Dimayê ke tepişteya sîyasî Mahbube Şabanî ya ke Zindanê Vekilabadî yê Meşhedê Îranî de ya, bê ti hincetêko fermî kerdî karantîna, endîşeyê derheqê qerarê dardekerdişî ke do bêro dayene, hîna zêde kerdî.

 

Îran de her çend prosesê huqûqî yê derheqê dewayanê sîyasî hema zî merkezê rexneyanê cimatê mîyanneteweyî û rêxistinanê heqanê merdiman de bê zî, tepişteya sîyasî Mahbube Şabanî ya ke Zindanê Vekilabadî yê Meşhedê de yena tepiştiş, semedê beşê karantîna ameya neqlkerdiş. Karantînaya bêsebeb, bî sebebê endîşeyanê neweyan.

 

Goreyê agahîyê ke ameyî destfîstene, Mahbube Şabanî ya 30 serrî verê demêk bêsebebêk fermî qawîşa xo ya zindanî ra semedê beşê karantîna ameya neqlkerdiş. Çimeyê nêzdîyê babete îdîa kenê ke selahîyetdarê zindanî wextê neqlkerdişî de aye re vatê ‘beno ke ti cezaya dardekerdişî dir rî bi rî'. Sewbîna ame dîyarkerdiş ke dosyayê Mahbube Şabanî sewqî Dadgeha Şorişî ya Meşhedê ameya kerdene.

 

Sûcdarîye: Hetkarîdayîşê çalakîkeranê birîndaran

 

Goreyê îdîaname de, sûco sereyîn yê ke Mahbube Şabanî de yenê bar kerdene, protestoyanê peynî de kesê ke birîndar bîbî bi motorsîkleta xo berdê merkezanê weşîye yo. Selahîyetdarê huqûqî nê faliyetî çarçewaya ‘Xebateka destekdayîşê endamanê girêdayeyê Îsraîl, DYE û komê muxalîf’ de erjna.

 

Labelê, çimeyê nêzdîyê dewa dîyar kerdî ke Mahbube Şabanî tenê hetkarîya weşîye daya kesanê birîndaran, labelê pêwa nê muhîmî zî no faliyet sey binyatêko semedê sûcdarîyanê asayîşî ameyo hesibnayîş. Îdîanameyê verên de sûcdarîyê ‘muharebe’ (têkoşînê çekdarî hemverê dewlete) estbî, labelê nê sûcdarîyî îdîanameyê fînalî ra vetî. Çimeyî dîyar kenê ke vera nê sûcê bînî yê ke dosya de ca gênê, eşkenê rayîr semedê qeraranê giran û heta hukmê dardekerdişî abikerê. Karantînaya ke Mahbube Şabanî ci de ya, nê endîşeyan hîna zêde kena.

 

Dewaya Mahbube Şabanî semedê domnayîşê muhakemekerdişî neqlê Şubeyê Yewine yê Dadgeha Şorişî yê Meşhedê ameya kerdene. Yeno pawitiş ke muhakemekerdiş rojanê verê ma de dewam bikero.