Bûşra Turan

 

AGIRÎ - Endama Heyetê Îdarekarîya Herêmî Cemîle Duman dîyar kerd ke vurîyayîşê cimatî di îdarekarîyanê herêmîyan de bi serkêşîya cinîyan û beşdarîya pêroyî mimkûn beno û ê do modelê xoserîya herêmî bi perspektîfê demokrasiyê beşdar ê ke Rayberê Şarê Kurdî Abdullah Ocalanî ser o vinderto, bica bikê.

 

Konferansê Îdarekarîyanê Herêmîyan yê Demokratîke ke Amed de ame viraştene, çar rojî dewam kerd. 6 û 7 hewteyî de Konferansê Cinîyan ê Îdarekarîyanê Herêmîyan yê Demokratîkan bi sloganê “Bi îradeyê cinîyan ma benî komun, bi îdarekarîyanê herêmîyan cimatê azad mûnenê”, dima ra zî 8 û 9ê hewteyî de zî Konferansê Îdarekarîyanê Herêmîyan yê Demokratîke yê Pêroyî bi sloganê "Bi Îdarekarîyanê Herêmîyan yê Demokratîkan Ver bi Cimatê Komûnalî" ame viraştene. Deklarasyonê her di konferansan ameyî eşkerakerdiş û plansazîyê ameyoxî ameye vetene.

 

Endama Heyetê Îdarekarîya Herêmî Cemîle Duman derheqê modelê îdarekarîyanê herêmîyan yê demokratîke de ajansê ma JINNEWSî rê qisey kerd.

 

Cemîle Duman Konferansê Îdarekarîyanê Herêmîyan ser o wina vat: "Sloganê konferansê cinîyan semedê dîyayîşê çareserîyanê problemandê cimatî yê ke est ê û destnîşankerdişê rayîr û metodê ke ma do taqîb bikê, muhîm bîye. O sewbîna nêzîkayîyekê dîyar keno ke persê manaya nê sloganî şarî dir keno û heme leteyê cimatî senî no slogan hîs û fîkranê xo de erjnenê. Semedo ke hucreyê bingehîne yê cimatî cinî yê. Semedê nê sebebî zî ma proses bi îradeyê cinîyan dest pêkerd. Armancê ma o yo ke cinîyan bi erjanê înan ê tarîxî, roşnvîrî, madî û manevî ra reyna giredê û cinî bibê kerdoxê sereyîn."

 

Desteserkerdişê îradeyê şarî

 

Cemîle Duman bal ant serê awankerdişê cimatê demokratîkî û va: "Nasnameyê cinîyan yê dîyarkerdene ra wetêr, bi beşdariya cinîyanê wayîrê quwetî, cimatêko komûnal, demokratîk û azadîwaz şêno bêro awankerdiş. Cinî quwetê bingehîn û rojeva sereyîn ê nê awankerdişî yê. Proseso ke ma ci rê vanê vurîyayîş û averşîyayîş, ciwîyayîşê herêmî de, ware de, îfadeyê xo ya tewr somut vîneno. Îradeyê herêmî di nê warî de zaf muhîm o. Rayberê Şarê Kurdî Abdullah Ocalanî zî serê na xebate de vindarto. Bi nê fehmî, îdarekarîyê herêmî û şaredarîyî faliyetêko gerdûnî yê. Semedê ke vurîyayîş û averşîyayîş sewîyeya herêmî de dest pêkeno. Konferansê Îdarekarîyanê Herêmîyan de ame destnîşankerdene ke ganî Peymana Xoserîya Herêmî ya Ewropa Tirkîya de lezkî bêra bica kerdene. Ma bawer kenê ke îradeyê şarî hetê sîstemetê qeyûmî ra ameyo desteserkerdiş. Eke game bi nameyê demokratîkbîyayîşî bêra eştiş, ganî faliyetî sewîyeya herêmî de dest pêbikerê, ganî îdarekarîyê şaredarîyan yê weçînayeyî reyna bêrê serê xebatanê xo û ganî rêziknameyê qanûnî semedê ganîkerdişê sîstemetê hemserekeyî bêrê viraştene."

 

'Cinîyî do bibê serkêşê nê prosesî'

 

Cemîle Duman vat: "Her çend ke problemê Kurdî lezkî çareser bî zî, lazîm o ke ciwanî, cinîyî û raya pêroyî di verêgirewtişê xirabîyê cimatî yo ke rî dano de rolêko serkêş kay bikê. Yew problemo tewr pîlî yê cinîyan, hepsbîyayîşê zerreyê keyeyî yo, peyserverdayîşê dwareyê sîyasî de û dûrkewtişê ciwîyayîşê pêroyî yo. Nê semedê ra ganî nasnameyêko cinîyan ê hîna xurt bivejîyo werte. Semedê dîyayîşê çareserîyanê nê heme probleman, ganî ekonomîyêka herêmî ya xurt bêra awankerdiş. Cinî do bibê serkêşê nê prosesî, ciwanan û heme leteyanê cimatî mîyanê xo de gênê."

 

Semedê serkewtişê prosesê pêvînayîşî

 

Cemîle Duman wina dewam kerd qiseykerdişê xo: "Meseleya Kurdî wareyê şexsî, cimatî û ekonomî de problemê zaf cîdîyan mîyanê xo de gêna. Dimayê nêzdîye 200 serran polîtîkayanê înkar û îmhayî, Tirkîya semedê reyna awankerdişê xo hewceyê komareka demokratîke ya. Na xebate ganî bi heme şaran dir pîya bêra awankerdiş. Ma bawer kenê ke ganî rêziknameyê qanûnî yê lazîmî yê derheqê şert û mercê xebate û pêvînayîşê Birêz Abdullah Ocalanî de bêrê viraştene û ganî fîzîkî bêro verdayene, wa bêro verê şarê xo û leteyê cîyayên yê cimatî dir pêvînayîş biko. No semedê serkewtişê prosesê pêvînayîşan zaf muhîm o."