COLEMÊRG - Dayîka Delal Nûda Avenda ke Gever de emrêko ciwan de tewrê têkoşînê cinî û ciwanan bîbî, serra 2015ine de zî tewrê refanê gerîla bîbî û 5ê êlula 2022yîne de dinyaya xo bedelnabî, Îran Çogaçe derheqê têkoşînê kêna xo de qal kerd û va: "Ma bi têkoşînê ke kêna ma domnaya serberz ê. Ma semedê Rayberê xo azadîye wazenê."

 

Xeylê waranê Kurdistanî de, bi serkêşîya Komeleya Hetkarî, Paştdayîşî, Yewîye û Kulturî ya semedê Keyeyanê ke Merdimê Xo Wareyê Şaristanîye de Vînî Kerdê (MEBYA-DER), çalakîyê vîrardişî ameyî awankerdiş. Yew ê cayanê ke nê çalakîyê vîrardişî tede ameyî awankerdiş zî qezaya Geverî ya Colemêrgî bîye. Gever de rojanê 25, 26 û 27ê Tebaxe de çalakîyê vîrardişî ameyî awankerdiş. Keyeyê Delal Nûda Avende (Ferah Çogaç) ya ke 5ê Êlula 2022yîne de dinyaya xo bedelnabî zî tewrê nê çalakîyan bîyî.

 

Delal Nûda Avend kam a?

 

Delal Nûda Avend (Farah Çogaç), ya ke cuya xo mîyanê têkoşînê azadîye yê cinîyanê kurdan de newe ra awan kerd, reya verêne emrêko ciwan de têgêrayîşê azadîya kurdî nas kerd. Her ke serra 2006î de tewrê çalakîyanê Ciwananê Welatparêz ê Şorişgêran bîye, aye rêxistinbîyayîşê ciwanan û cinîyan de berpirsiyarîye girewt serê xo û xeta azadîya cinîye kerd madeyê sereke yê cuya xo. Nûda Avende têkoşînê xo yo ke bajar de dest pêkerdbî, bi tewrbîyayîşê mîyanê refanê gerîla yê serra 2015î de derbasê wareyêko newe kerd; pîya bi çalakîyanê xo yê Zap û Avaşînî, aye fehmkerdişê xo yê derheqê îdeolojiya azadîya cinîye de kûrêr kerd.

 

 

Delal Nûda Avend tena bi qiseyan nê, labelê her warê estbîyayîşê xo de têkoşînê semedê cuyêka azad û rêxistinbîyaye ya cinîyan aver berd; sewbîna aye perwerdeyê tibî yo ke girewt, semedê dermankerdişê hevalanê xo yê ke şer de birîndar bîbî, şixulna.

 

Raywanîya Delal Nûda Avend a têkoşînî ke bi çalakîyanê ciwanan Gever de dest pêkerdbî, vurîya pratîkêko cuye û xoverdayîşî yo ke xo seperneno azadîya cinîye; aye cuyêka ke bi têkoşînê azadîya cinîye ameybî awankerdiş peyê xo de verda. Hîkayeya Delal Nûda Avend, hîkayeya cinîyêke Geverî ya ke xo bi rayîrê têkoşînî pênase kerd û peyê azadîye de şîye.

 

Delal Nûda Avend serra 2022yîne de tewrê xoverdayîşê wareyê Şikefta Birîndara ya Zapî bîye û 5ê Êlula 2022yîne de dinyaya xo bedelnaye.

 

Îran Çogaçe bahsê cuye û têkoşînê kêna xo Delal Nûda Avend (Ferah Çogaç) kerd.

 

 

Îran Çogaçe ard ziwan ke Delal Nûda Avend serranê xo yê mektebî de bi serkewtiş û kedkarîya xo tesîr her kesî ser kerdêne; sewbîna dîyar kerd ke kêna aye zanîngehe qedênaya û demo ke pawîyêne tayînkerdişê xo yo fermî yê gureyî, marketêk de xebitîyaya. Îran Çogaçe va: "Verê ke tewrê têgêrayîşî bo, aye zaf kûr fikar kerdêne û zaf reyan dûrî ra ewnîyêne. Ma tim pers kerdêne ka çi bîyo, labelê aye israr kerdêne ke çîyêk nîyo û baş a. Delale, ke bi pêroyî her şewe kitabî wendêne, a şewe nêwend. Demo ma sibayî hewn ra rawuştî, ma eşnawit ke Delale keyeyî ra vecyaya û tewrê refan bîya. Birayê aye û ez her cayî de peyê aye de geyrayî labelê ma aye nêdîye; dima ra xebere ameye ke aye tewrê têgêrayîşî bîya. Birayê aye û ez şîyî peyê aye ke aye bivînê, labelê ma nêşa ê wareyê ke aye tede bîye bivînê, semedê nê ma agêrayî. Aşmî û serrî derbas bîyî, labelê ma êdî qet kêna xo nêdîye. Bi serran, teyna mi waştêne ke vengê aye bieşnawî, labelê ez bi hesretê ê vengî menda."

 

‘Ma bi têkoşînê kêna xo serberz ê’

 

Dadî Îran Çogaçe, bi mojnayîşê serberzîya xo ya vera têkoşînê kêna xo wina va: "Delal şerê Efrînî de zî ca girewt. Aye uca de şer kerd û xebera birîndarbîyayîşê aye resea ma. Dima ma eşnawit ke aye baş bîya û semedê dewamkerdişê têkoşînî şîya Qendîl. Demo ke Gever de qedexeyê vecyayîşê teberî ame deklarekerdiş, Ferah kûrî ra tesîrdar bîbî; aye nêeşkayîne vera çîyanê ke qewimîyenê bêveng bimana û va: 'Ez o semedê şarê xo û semedê tutan şer bikî.' Bi serran semedê şarê xo şer kerd û şehîd kewte. Ma bi aye serberz ê, semedê ke aye cuya xo bi hawayêko ke waştêne, ciwîya.."

 

‘Ma azadîya Rayberê xo wazenê’

 

Îran Çogaçe, bi vatişê ke şarî wayîrveciyayîşê merasîmê vîrardişî yo ke Gever de semedê şervananê azadîye yê ke dinyaya xo bedelnayî kerd û na çalakîyêka bi tesîr bîye wina va: "Uca de her kesî semedê şehîdan ked da û eleqe nîşanê ma da. Ez sersaxîye Rayberê xo û Şarê Kurdî rê wazena. Prosesêk est o û ma wazenê o proses aver şêro. Ma azadîya Rayberê xo wazenê. Ma amade yê semedê serkewtişê prosesî çîyo ke hewce keno bikerê. Ma tutê xo vînî kerdî, labelê waştişê ma no yo ke gerîlayê ke mendê biresê keyeyanê xo.”