Dayîkê Aştîye: Ganî tepişteyê nêweşî lezkî bêrê veradayîş
- 11:01 20 Teşrîna peyêne 2026
- NAROJANE
STENBOL - Endamê Meclîsê Dayîkê Aştîye yê Stenbolî bale antî rewşa tepişteyanê nêweşan ser û dîyar kerdî ke Newroz Bozkurt û Evîn Zapsu û heme tepişteyî ganî bêrê veradayîş û vatî: "Zîndanan ra cenazeyî vejenê. Ganî wezaretê edaletî lezkî bikewo têgêrayîş."
Reaksîyonê hemverê astengkerdişê tehliye û dermankerdişê tepişteyanê nêweşan dewam kenê. Endamê Dayîkê Aştîye yê Stenbolî Bedîa Gokguz, Cemîle Çîftçî û Guler Bugday derheqê mesele de qisey kerdî û vatî ke ganî lezkî tepişteyê nêweşî bêrê veradayîş.
Dayîka Aştîye Bedîa Gokguz hemverê tehliyenêkerdişê tepişteyanê nêweşan reaksîyon mojna û va: "Çîyê ke yenê ciwîyayîş wijdanî dejnenê. Êdî hewnê şewan ma ser o heram bi. Bi hezaran tepişteyê nêweşî nêyenê tehliyekerdiş. Tepişteyê nêweşê giranî yê kanserî est ê. No çi wijdan o? Qalê aştîye kenê. Na çi aştî ya? Tena hetê ma game eşt. Yew het nêbeno. Çira ê zî nêerzenê, çira tepişteyan veranêdanê? Ma senîn bawer bikerê? Çaw proses? Wa ma nêxapênê, ma kayê kesî nîyê. Wa peyniye ferzkerdişê poşmanîye rê bêro. Wa tepişteyî bêrê veradayîş. Wa cenazeyî zîndanan ra nêvejê. Newroze û Evîne û heme tepişteyê nêweşî ganî bêrê veradayîş. Lazim o tu kes bêveng nêmano. Ganî Wezaretê Edaletî û mercîyê têkildarî bikewê dewre."
Ne tehliye ne dermankerdiş
Dayîka Aştîye Cemîle Çîftçî zî va ke birayê aye 29 serrî yo tepişte yo, pêwa nêweşîyanê ci nêyeno veradayîş û va: "Ez venga yewbîyayîşî keyeyê tepişteyan rê kena. Heqê cuya tutanê ma destê înan ra ameyo girewtiş. Ganî keyeyî wayîrê tutanê xo bivejê û bibê yew. Ganî tutê ma yan bêrê dermankerdiş yan zî bêrê tehliyekerdiş. Kênaya Dayîka Sultane, Newroz Bozkurt nêweşa girane ya. Nika berdîyaya nêweşxane. Ma bi serran vanê tutanê ma verabidê, semedê tepişteyan game bierzê."
Dayîka Aştîye Guler Bugday zî wina ard ziwan: "Bi hezaran tepişteyî semedê ke vengê xo bidê eşnawitiş têkoşîn kenê. Ganî berê zîndanan bêrê akerdiş. Ma bi şewe û roje vanê. Tepişteyê nêweşan bidê veradayîş. Ma bi serran têkoşîn kenê. Ma ancî veng danê. Ganî her kes wayîrê zîndanan vejîyo û goreyê ruhê prosesî têbigêro.”
