Jiyan Gencan

 

QAMIŞLO - Rojnamegere Ciwana Cuma ya ke hêrişê hemverê şarê kurdî kêlî bi kêlî taqîb kerd va: “Bi piştîdayîşê şarê ma yê Rojawanî dir o ruhê yewîya şarê kurdî reyke bîn vejîya orte. Wayîrvejîyayîşê Rojawanî cewabêk xurt bî hemverê hêrişan. Plan û hêrişê şarê kurdî ser o pîlê û tehluke hîna dewam keno, ganî şarê ma piştîdayîşê xo bidomno. Şarê ma do bi xoverdayîşî bi ser kewo.”

 

6ê Çeleyî de komê cîhadîst ê girêdayeyê hukmatê demkî yê Şamî hemverê Rojawanê Kurdistanî de hêrişê zaf hetî dayî destpêkerdiş. Hêrişê komê cîhadîstî heta 29ê Çeleyî dewam kerd. Bi peymana 30ê Çeleyî adirbest pêro herême de ame neqlkerdiş. Adirbestî dir semedê entegrasyonê hukmatê Şamî dir 8 madeyan ser o peymane ameye îmzakerdiş. Labelê pêwa peymane zî tehluke û ablûqayê Rojawanê Kurdistanî ser o dewam keno. Tewr zêde zî bajarê Kobanê de 21 rojî yo ablûqayêk giran est o. Na ablûqa cuyayîşê 600 hezar roniştoxanê bajar û koçberê ke semedê hêrişan verê xo dayî Kobanê tesîrê xo zêde keno.

 

Rewşa herêmî ser o rojnamegere Ciwana Cuma ya ke destpêkê şerî ra kêlî bi kêlî têkoşînê ameyo dayîşî taqîb kena, çimdarîyê xo ajansê ma rê pare kerd.

 

‘Vurnayîşê hukmatê Şamî dir hêrişî nêvindertî’

 

Rojnamegere Ciwana Cuma destpêkê qiseykerdişê xo de qalê vurnayîşê rejîmê Baasî kerd û wina va: “Dimayê ke rejîmê Baasî ame rijnayîş, rejîmêk newe ame hukmatî ser. Rejîmê Baasî ke serranê zafî zilm û zordarî xeylêk herêman ser o domna, dimayê rijnayîşê ci rejîmo ke newe ame hukmatî ser o zî bi qirkerdişan dest bi kar kerd. Hukmato demkî yê Şamî wexto ke ame ser elewî û durzî qirkerdişan ra derbas kerd. Dimayê nê zî wazenê şarê kurdî qirkerdişî ra derbas bikerê. 10ê Adara 2025ine de peymanêka mîyanê Hêzê Sûrîyeya Demokratîk û hukmatê Şamî de ameye îmzakerdiş. Goreyê peymane ganî adirbestêk biameyîne domnayîş, labelê dimayê peymane hêrişê herêmê ke taybetî kurdî ci de bî, vindarnayîş. Hêrişî hemverê neteweyê kurdî û herêmê xoser zêde bî. Wazenê nê pêameyanê ke binê sîwanê Hêzê Sûrîyeya Demokratîk (HSD) de ciwîyenê orte ra wedarnê.”

 

‘Cinîyê kurdî têkoşînê bîyayîş û çinbîyayîşî rê serkêşî kerdî’

 

Ciwana Cuma behsê têkoşînê cinîyê kurdan yê mîyanê şerî de zî kerd û wina ard ziwan: “Nê têkoşînî de zî cinî reyke bîn serkêşîya xo mojnayî. Şervana cinî ya ke pawitişê taxa xo kerd heta peynî têkoşîn da û şehîd bî. Çeteyê ke merdimîye ra para xo nêgirewtî cenazeyê aye qata 3ine ra eştî. Nê dîmenî nîşanê heme dinya da ke cenazeyanê ma ra zî tersenê. Hemverê nê hovîtîya çeteyan reyke bîn cinîyê kurdî rûmetê şarê xo bi canê xo pawitî û heta peynî xo ver dayî.”

 

‘Bajarê Reqayî bi temamî kewt binê destê DAIŞî’

 

Ciwana Cuma ard ziwan ke nika bajarê Reqayî reyke bîn kewt binê destê DAIŞî û wina va: “Reqa de DAIŞî bi fermî îqtîdarê xo îlan kerd. Nika roniştoxê Reqayê vanê ma vêşan ê û çeteyê DAIŞî xo Reqa de newe ra awan kenê. Vernîya çimanê koalisyonê mîyanneteweyî de zîndanê çeteyê DAIŞî ame akerdiş û vengê xo nêkerdî. Rewşa ke vejîya orte komployêk dewletan ê şarê kurdî ser o bî. Wazenê senaryoyê elewî û durzîyan şarê kurdî ser o reyna bikerê. Labelê nêzanê ke şarê kurdî xoverdayox o û do heta peynî pawitişê xo bikero.”

 

‘Çar hetê welatî de semedê Rojawanî wayîrvejîyayîş virazîya’

 

Ciwana Cuma ard ziwan ke wayîrvejîyayîşê Rojawanî çar hetê welatî de zaf bi hêz bî û wina peynî da qiseykerdişê xo: “Vakur û Başûrê Kurdistanî bi ruhê seferberîye verê xo da Rojawanî. Nê xoverdayîşî dir ruhê yewîya şarê kurdî reyke bîn vejîya orte. Wayîrvejîyayîşê Rojawanî cewabêk xurt bî hemverê hêrişan. Plan û hêrişê şarê kurdî ser o pîl ê û tehluke hîna dewam keno, ganî şarê ma piştîdayîşê xo bidomno. Şarê ma do bi xoverdayîşî bi ser kewo.”