Devrîm Findik

 

STENBOL - Endama Komîteya Îdarekara ÎTOyî Irmak Saraç derheqê cezaya ke gumanbarê dosyaya Yusuf Ziya Gumuşelî de ameye birnayîş qisey kerd û va ke her nêzdîbîyayîşêk ke îstîsmarê tutan normal keno hem hemverê heqê tutan, hem zî hemverê etîkê meslegî yo.

 

Dimayê ke dewaya Yusuf Ziya Gumuşelî de ceza gumanbaran ser o ameye birnayîş, polîtîkayê bêcezaverdayîşî, heqê tutan û têkoşînê cinîyan ancî munaqeşeyî rê ameye akerdiş. Endama Koordinasyonê Cinîyan û Komîteya Îdarekarîya Odeya Tabîban ê Tirkîya Irmak Saraç derheqê polîtîkayê bêcezaverdayîşî, mekanîzmayê pawitişê tutan, têkoşînê hemverê îstîsmarê tutan de qisey kerd.

 

‘Semedê doktorî tutî kerdoxê heqî yê xoserî yê’

 

Irmak Saraç dîyar kerd ke pawitişê tutan serê heme prosesanê îdarî û edaletî de yo û wina va: “Emrê tutî de û bi zorî zewac nêeşkeno bêro meşrûkerdiş. Ez na rewşe sey îstîsmar biname kena. Veradayîşê Yusuf Ziya Gumuşelî, tena hîsê edaletî nêleqneno, pêwa nê sucanê wina teşwîq keno. Semedê doktoran pawitişê tutan berpirsîyarîyêk etîkî yo. Semedê doktoran tutî kerdoxê heqî yê xoserî yê.”

 

‘Îfadeyê zewaca emrê qijî de rastîye niminenê’

 

Irmak Saraç eşkera kerd ke hemverê ziwanê ke îstîsmarê tutan meşrû keno lazim o ke helwestêk bi qerardarî bêro mojnayîş û wina eşkera kerd: “Ma sey komîsyonê cinîyanê Odaya Tabîban ê Stenbolî her wext vanê ke îradeyê ‘zewacê emrêk qijî de’ rastîye nimineno û îstîsmarî meşrû keno. Rayîrê vernîgirewtişê îstîsmarî têkoşînê semedê Peymana Stenbolî vîyareno.”

 

‘Berpirsîyarî bi tena serê xo nêeşkeno bar bibo kesan ser’

 

Irmak Saraç ard ziwan ke xebatkarê weşîye derheqê naskerdiş, tomarkerdiş û neqlkerdişê îstîsmarê tutan de berpirsîyar ê û va: “Cipersayîşêk bi tesîrî nêyeno kerdiş. Hawirdorêk ke gumanbarî bêceza yenê verdayîş de hewldayîşanê xebatkarê weşîyeyî zî bêcewab maneno. Çi heyf, ma zaf reyan na rewşe ciwîyenê. Pawitişê tutan tena doktoran rê nêeşkeno bêro verdayîş. Lazim o ke sîstemê edaletî, mekanîzmayê xizmetê komelî û polîtîkayê pawitişê tutan bi tesîrî pê bêro. Berpirsîyarî tena kesan ser o nêeşkeno bêro barkerdiş.”

 

‘Lazim o ke xeta têkoşînê hembeşî bêro mûnayîş’

 

Irmak Saraç va ke no problem êdî tena hedîse ser o nêeşkeno bêro ercnayîş û lazim o ke esasanê bi kokî yê pey hedîseyan bêrê vurîyayîş û bale ant muhîmîyê têduştîya cinsîyetê komelî ser û va: “Sîstemê patriyarkal serdestîyê mêrdan meşrû keno. Cinîyan, tutan, LGBTÎ nêyenê dîyayîş. Nê semedî ra polîtîkaya weşîye ya ke heqê cinî û tutan esas gêna lazim o ke têduştîya cinsîyetî de esas bigîro. Îstîsmarê tutan tena hedîseya edaletî nîyo, problemêk sîstemî yo û lazim o ke hemverê nê xetêka têkoşînî yê hembeşî bêro mûnayîş.”