Berîtan Tunç

 

ÎZMÎR - Cinîyan prosesê Aştî û cimatê Demokratîkî yo ke bi vengê Rayberê Şarê Kurd Abdullah Ocalanî re ameyo destpêkerdene semedê şaran sey hêvî erjna û vat: “Sererastkerdişêko ke asayîşê tepişteyanê nêweşan, heqê ziwanê dayîke û kesanê ke tewrê prosesî bîyî esas nêgêro, cimatî re zî bawerîye nêdano.”

 

Bi vengê Rayberê Şarê Kurdî Abdullah Ocalanî yo ke 27ê Sibate 2025ine de kerd de, Prosesê Aştî û Cimatê Demokratîkî ame destpêkerdene. Nê prosesî de dewlete game nêeşta û munaqeşeyê derheqê ‘qanûnê çarçewa’ de dewam kenê.

 

Cinîyan derheqê babete de fikrê xo ardî ziwan û vatî aştîyeka mende bi gamanê ke bawerîye danê, mimkûn a.

 

Rahîme Turane da zanayene ke proses semedê heme şaran hêvî yo û ganî feydeyê prosesî bêro zanayene, gamanê somutan bêrê eştiş û va: “Heta ke gamê nêrê eştiş, bawerîya şaran zî nêbena. Eke gamî nêrê eştiş dîyar o ke aştîye nêwazenê. Pêwa heme dej û zilmî, ma aştîye de bi israr ê. Ganî şarê kurdî bibo yew. Ganî tepişteyê nêweşî bêrê verdayîş. Madem aştîye wazenê, ganî tepişteyî azad bê. Ganî gerîlayî aktîf tewrê prosesî bibê.”

 

‘Ma aştîye wazenê’

 

Îkram Demîre zî bala ant serê prosesî û dîyar kerd ke hêvîya înan a tewr pîl aştîye ya û wina dewam kerd: “Êdî bes o. Wa ne polîsî wa ne leşkerî kes nêmiro. Şer 50 serrî yo dewam keno. Semedê her kesî çetîn o. Mamoste, avûkat, parlamenter, wendekar, cinî her kes ameyî tepiştiş. Wa no zilm biqedîyo. Proses serrêk û nîm o dewam keno. Kedêka pîl ameya dayene. Ganî êdî no proses temam bibo. Qanûnê ke do bêro vetene de, ganî semedê ziwanî statuyêk estbo. Her kes aştîye wazeno. Ciwîyayîşêko têduşt wazeno. Ma heme yew ê. Ganî semedê tepişteyanê nêweşan, heqanê ma, tutanê ma û ziwanê ma sererastkerdişêk bibo.”

 

‘Hema zî vatişê terorîstî şixulnenê’

 

Zeynep Dumane zî dîyar kerd ke ganî ti dayîkêke nêbermê û nê çîyî vatî: “Bi serran o şer dewam keno. Ganî êdî biqedîyo. Ganî aştîye bêra. Kam vano ma kurd ê, yenê tepiştiş. Prosesêko wina nêbeno. Semedo ke ma vanê ma kurd ê, ma benê terorîst. Ma nê qebûl nêkenê. Ma aştîye wazenê. Ma azadîya Abdullah Ocalanî wazenê. Bi serran o heqanê şarê kurdî paweno, semedê nê sebebî tepişte yo. Êdî bes o. Wa aştîye bêra.”